الدواجن و ارتفاع درجات الحراره
هام وعاجل جداً جداً جداً
إن شاء الله درجة الحرارة بداية من غداً ترتفع إلى 38 حتى تبلغ الذروة يوم الجمعة واللى هتوصل فيه 45 درجة مئوية وده مستحيل الفراخ تستحمله وطبعاً الأفضل إنك تكيف عنبرك مع العلم إن أقصى درجة حرارة بينزلها التكييف حوالى 10 درجات فقط وده بيخفف الضرر ولكن الخطر مازال قائم.
طب والعمل؟؟
هنحاول نقلل الإجهاد الحرارى على الفراخ فى كذا حاجة كده وده بالتالى يقلل الخساير من الموجة الحارة دى :
- أول حاجة خلى بالك أوى من خزان المياة بتاعك لأنك بتهتم بالعنبر وتكييف العنبر وتنسى الخزان المرمى وسط الشمس واللى المياه بتغلى جواه وتفضل سخنة لحد منتصف الليل . لازم لازم لازم تحط فيه ثلج بحيث إن المياه اللى توصل للفراخ تكون فاترة لا ساقعة قووى ولا سخنة أوى ... وبرضه لازم سيادتك تغطيه من أشعة الشمس المباشرة .
- لازم معاليك ترفع العلف وخلى بالك من كلمة ترفع العلافات دى عشان توسع كمان مكان لفراخك وده بيتم من فترة الضحى وحتى قبل المغرب بقليل وخلى بالك إن العلف بس هو اللى بيترفع 😂 ولازم لما تنزله يكون الإجهاد الحرارى قل شوية على الفراخ ولازم تتأكد أثناء التعليف من وجود مياه للشرب .
- لازم معاليك تنزل فى المياه أدوية لمعالجة الجفاف وأدوية للإجهاد الحرارى ويفضل اللى بتحتوى على أسبرين مع منتول وفيتامين ج وده لازم يتم من الفجر للعشاء .
- لازم طول الليل تنزل رافع مناعة لأن الإجهاد الحرارى بيعمل خلل فى الجهاز المناعى للطائر.
-خلى بالك إن من الطبيعى لأنك هتقلل فترات التعليف إن الفراخ يظهر عليها براز أخضر فماتقلقش .
- الصبح بدرى أول ماتصحى رش حوالين العنبر والسقف والحوائط مياه وماتزودهاش ولا ترشها أثناء الموجة الحرارية لأنها بتتبخر وتزود رطوبة.
- تأكد من جودة خطوط المياه ومستوى السقايات قدام الفراخ.
وربنا يكملها بالستر على الجميع
د/محمد الإمام
00201224576768
أضيف بتاريخ 22 مايو 2019 الساعة 3:23 مساء
عدد القراء 471
