افهم ازاي تكسب من تربية وإنتاج الوز صح
اغلب الناس الي بتربي الوز في مصر عندها ضعف معلومات عن تربية الوز لذلك اي حد بيربي وز مش عارف ازاي ينتج ويستفاد ويكسب من تربية الوز في مصر
في جميع الدول في الخارج زي تركيا وألمانيا وفرنسا وامريكا
الدول دي عندها صناعة كاملة وشركات متخصصه في إنتاج لحوم وكبد الوز
الناس دي عندها مزارع اقل مزرعة فيها 5000 ام من الوز منتجه
بيعرفو ازاي يستفادو من انتاج كل وزة في مزرعتهم
بيعرفو ازاي يستفادو من اللحوم والاحشاء والكبد المسمن كلها حتي الريش بيدخلوه في صناعة اغلي المخدات والخدوديات العالميه من ريش الوز
الناس دي بتقدر تنتج من كل ام من الوز مش اقل من 5 ل6 بطون ومش اقل من 60كتكوت ل70 كتكوت وز من كل ام في كل موسم انتاج
وده بيرجع لدرياتهم ومعلوماتهم عن رعاية وتغذية الوز الصحيحه
واحنا هنا في مصر مش عارفين ننتج 20كتكوت في الموسم وده بسبب أخطأنا في التفريخ والإنتاج
تعالو اشرحلكم الناس دي ازاي بيقدرو ينتجو من كل ام 60كتكوت في الموسم
اولا الناس دي ليها برنامج تغذيه ماشيه عليه صح ولكل مرحلة عمريه برنامج غذائي والموضوع ده هنتكلم عنه في بوست تاني لان الموضوع ده يطول شرحه
الي عايز اعرفهلكم واشرحه ليكم في البوست ده هو ازاي تستفاد من كل وزة بتبيض وعايز تاخد منها في الموسم اعلي نسبة انتاج
بص ياغالي من الطبيعي إن الوز إنتاجه موسمي والوزن هنا في مصر بينتج في الشتاء والربيع والخريف وبيريح في فصل الصيف الي هو من اول شهر 6 الي نهاية شهر 8
وبيبدأ يحضر ويبيض من نصف شهر 9 الي نهاية شهر 5
يعني الوز بيبيض في خلال فترة 8شهور ودول فصول الشتاء والربيع والخريف وبيريح بيض حوالي 4شهور ودول فصل الصيف
في خلال ال8 شهور الي الوز بيبيض فيهم مع التغذيه الصح والسلالة النضيفه نتاية الوز تقدر تبيض مش اقل من 70بيضه في الموسم
بس احنا في مصر هنا نظام التفريخ بتاعنا غلط وده الي بيخلي انتاج ضعيف جدا جدا
يعني ايه مش فاهمين ممكن توضح ياهندسه
هشرحلكم بكل بساطه
كلنا عارفين أن طبيعة الوز بيبيض يوم ويريح يوم
يعني لو هنفترض انك عندك سلالة نضيفه جدا وبتغذيها تغذيه كويسه ورعايه ممتازه في نقطه انتم مش واخدين بالكم منها ودي اهم نقطه بتفرق معانا جدا في الانتاج
النقطه دي هو إن لما الوز بيبيض يوم ويريح يوم يعني الوزة في البطن الواحد ممكن تبيض حوالي من 12 ل17 بيضه يعني متوسط 15بيض وزي ماقلت إن الوز سلالة نضيفه ورعاية وتغذيه جيده
يعني ال15 بيضه الي الوزه هتبيضهم دول هيتباضو في خلال شهر لان زي ما قولت وكلنا عارفين أن الوز بيبيض يوم ويريح يوم يعني ال15بيضه هيتباضو في خلال شهر
طب الوزه باضن في خلال شهر والوزه بعد لما تخلص بيض هترقد علي البيض وهتقعدلها شهر راقده علي البيض
وكلنا عارفين أن الوزن لما بترقد علي البيض وزنها بيضعف جدا وبتخف لان اكلتها بتضعف جدا وممكن تقعد يومين كاملين من غير اكل وده علشان تحافظ علي البيض
يعني لو وزن الوزة قبل ماترقد علي البيض وبعد ما تطلع البيض ويفقس هتلاقي وزنها نزل خس النص
طب الوزه علشان ترجع تاكل وتملي تاني من جديد علشان تحضر للبيض للبطن التاني الوزه عايزالها فترة مش اقل من شهر علشان تقدر تحضر بيض للبطن الجديد
يعني لو حسبتها هتلاقي إن الوزة علشان تديك بطن واحد عايزلها مش اقل من 3شهور شهر تبيض فيه وشهر ترقد فيه وشهر تاكل وتملي وتحضر للبيض وترجع تبيض البطن التاني
والموسم زي ماقولتلكم فوق إن الموسم عبارة عن 8شهور
طب لما يبقا الموسم 8شهور وانت ضيعت منهم حوالي 3شهور في إنتاج بطن واحد
يبقا الوزه آخرها تبيض في الموسم بطنين اتنين او ثلاثه بالكتير بالنظام ده
وطبعا الوز هنا تغذيته ضعيفه والسلالة نفسها ضعيفه وأغلب البيض بيبوظ بسبب ضعف خصوبة الذكور والبيض بيطلع لايح أو البيض الأجنة بتموت جواه والبيض بيتكبس
يعني بالنظام الي احنا شغالين عليه في مصر ده اكبر عدد كتاكيت وز ممكن تاخده من النتايه في الموسم هو من 20 ل30كتكوت في الموسم
لذلك لازم نفهم تفريخ بيض الوز صح علشان نقدر نستفاد من الإنتاج وتقدر تنتج من كل ام مش اكل من 60كتكوت في الموسم
وطبعا افضل نظام لتفريخ بيض الوز هو انك تفرخه في فقاسه وده ليه فوائد كتيره
اولا البيض لما تجمعه وتحطه في الفقاسه كده الوزن الي هتبيض مش هترقد وكده يبقا وفرنا في الموسم شهر وبدام أن الوزن مش رقدت علي البيض يبقا جسمها هيفضل محافظ علي وزنه وخلال 15 يوم بعد ماتخلص بيض جسمها هيملا من تاني وهتبدأ تبيض البط الجديد
يبقا احنا كده وفرنا حوالي شهر ونص في كل بطن الوزه هتبيضه في الموسم وده هيخلي الوزه بدل ماتبيض بطنين الو ثلاث بطون بس هتقدر باذن الله تبيض من خمس لست بطون في الموسم يعني الضعف بس لازم نراعي نقطة التغذية في موسم البيض
ومن أهم مميزات تفريخ بيض الوز بنظام الفقاسه انك بتحافظ علي البيض من التلف ولو عندك فقاسه نظامها كويس ومشيت علي نظام تفريخ بيض الوز كويس هتقدر تنتج من البيض مش اقل 97% من البيض وطبعا هشرحلكم نظام تفريخ بيض الوز في الفقاسه ازاي في بوست تاني إن شاء الله
ومن أهم مميزات تفريخ بيض الوز بنظام الفقاسه انك لو عندك مزرعه بتقدر تجمع البيض وتدخله دفعات في الفقاسه وده بيتجنب تفاوت اعمار الكتكايت ويتكون الكتاكيت دفعات واعمار واحده
وكده تقدر تكسب من انتاج الوز ومكسبك يبقا الضعف باذن الله لو اشتغلت بالنظام ده
أضيف بتاريخ 06 فبراير 2023 الساعة 07:49 صباحا 
عدد القراء 287
